Letonia fiton garën tradicionale ushtarake “Saulauf” në Kampin Bondsteel

Forcat gjermane organizuan garën tradicionale ushtarake “Saulauf” në Kampin Bondsteel në Kosovë, ku morën pjesë 12 ekipe nga pesë shtete të KFOR-it – Finlanda, Gjermania, Polonia, Letonia dhe Shtetet e Bashkuara të Amerikës.

Sipas njoftimit të KFOR-it, garuesit u përballën me një sprovë të vështirë që përfshinte vrapim prej 6.5 kilometrash dhe pesë stacione intensive. Sfida përfshinte tërheqjen e një kamioni, zhytjen në akull, hedhjen e granatave, qitjen me shenjë dhe transportimin e një të plagosuri prej 80 kilogramësh.

Në fund të garës, ekipi i Letonisë doli fitues duke treguar forcë, përkushtim dhe shpirt gare.

KFOR theksoi se qëllimi i këtyre aktiviteteve nuk është vetëm sfida fizike, por edhe ndërtimi i besimit, shoqërisë, solidaritetit, respektit të ndërsjellë dhe bashkëpunimit shumëkombësh mes trupave të saj.

Ndërkohë, KFOR vazhdon të zbatojë mandatin e tij të bazuar në Rezolutën 1244 të Këshillit të Sigurimit të OKB-së (1999), për të garantuar një mjedis të sigurt dhe të mbrojtur për të gjithë njerëzit dhe komunitetet në Kosovë, si dhe lirinë e lëvizjes. Ky mision mbetet i koordinuar ngushtë me Policinë e Kosovës dhe EULEX-in, në kuadër të roleve të tyre si reagues të sigurisë.